Goulennaoueg Diwan evit an dilennadegoù-kêr : an disoc’hoù
71 respont zo bet resevet gant Diwan d’ar 1añ a viz Meurzh.
05/03/2026
Diellfennadennoù klokoc’h a zo bet savet evit ar c’humunioù lec’h ma oa meur a respont.
E berr gomzoù, respontoù ar goulennata-mañ a ziskouez emañ ar brezhoneg war un hent “ensavadurel”. Diskouez a ra e vez soursiet muioc’h ouzh ar politikerezh yezh e live ar c'humunioù. Tremen a reer da vat eus un “harp arouezel” d'ur “mererezh foran gwirion”, daoust ma chom diforc'hioù bras etre al listennoù evel-just.
Setu ar poentoù pennañ a zeu war wel diwar an dielfennadenn hollek bet graet gant Kuzul-merañ Diwan :
Lakaat war wel ar sevenadur a zo asantet bremañ : Hogos an holl listennoù, ne vern o zu politikel, a zegemer bremañ ar panellerezh divyezhek hag obererezhioù e brezhoneg er servijoù publik evel el levraouegoù da skouer. Deuet eo da vezañ standardoù eus mererezh ur gumun a Vreizh.
An diforc'h war ar budjedoù pourvezet d’ar brezhoneg : Ar c’hraf diforc'husañ eo. N'eus nemet 15 listenn diwar 70 a zo prest da ginnig ur sammad resis a euroioù dre annezad pe ur sammad hollek. Memestra, merzout a reer e ra ar mennoz-se douget gant an Emsav e damm hent.
Kêrioù bras evel Brest hag an Oriant a ya pelloc’h evit ar re all. Ar budjedoù kinniget a ya en tu all da 300 000 €, tra ma kav gwell d'an tiez-kêr all ur "sell treuz-servijoù" , n’eo ket sklaer evit an annezidi petra eo ar striv arc'hantel (Naoned, Kemper, …).
Skoazell d'an deskadurezh (Diwan): Daoust ma vez degemeret mat paeamant ar forfedoù-skol dre vras gant darn al listennoù o deus respontet, e chom ur poent a ziforc'h politikel e kêrioù zo evel Naoned (listenn Johanna Rolland zo a-enep, n’he deus ket c’hoant da reiñ d’ar skolioù Diwan diavaez-kêr) ha Plañvour (listennan tu enep : an Ao. Maignan), e-lec'h ma vez nac'het krak-ha-berr evit “difenn ar briorelezh nemeti a zo d'an deskadurezh foran” (sell jacobin).
Eus an identelezh d'ar vicherelaat : C'hoant zo gant meur a hini da frammañ ar politikerezh yezh en ur anviñ un dilennad dileuriet d’ar yezh, tuta renerien raktresoù gouestlet d’ar politikerezh yezh (Kemper, Roazhon, Naoned) pe en ur grouiñ kreizennoù sevenadurel evel un Ti ar Vro (An Oriant, an Henbont). E Lokmikaelig e vez lakaet ar bouez war ur c’hinnig nevez : a-benn gwarantiñ padusted an oberoù e brezhoneg e vez kinniget micherelaat ar pezh a oa douget betek hen gant tud a youl vat hepken.
Karta "Ya d'ar Brezhoneg" evel nadoz-vor : Meneget e vez gant kalz listennoù an araokadennoù a vo graet evit tizhout ul live uheloc’h er garta (eus 1 da 4). Pal kreiz o c'hefridi eo, hag a dalvezo evel fichenn-hent ar respetad evit muzuliañ efedusted o oberoù (dreist-holl e Sant-Brieg, En Alre, e Pondi, … ).
E berr gomzoù eo un dra just ha normal evit darn al listennoù da reiñ ur plas dereat d’ar brezhoneg. An diforc'h etre an dud war ar renk a vo o barregezh da lakaat e pleustr (budjed dezho o-unan, lec'hioù da grouiñ, implijidi stummet) hag o youl da enframmañ ar brezhoneg er vuhez pemdeziek (krouiñ ur vagouri, kluboù goude ar skol, busoù) kentoc'h eget he c’henfinañ er bedig sevenadurel hepken.
Ar goulenn niverenn 2 :
Piv a vefe prest da zegemer ur skol Diwan nevez en e gumun ha kinnig ur savadur ? Respontoù dedennus a zo, kroaziet e vint gant roll raktresoù Diwan. Tu zo meizout dija e klot an traoù en Henbont (56) lec’h m’o deus div listenn diwar an teir war ar renk respontet edont a-du pourveziñ ur savadur 200 m² hag ur porzh skol d’ur raktres skol nevez.
Ar goulenn niverenn 7 a denne d’ar budjed dre annezad :
Hervez an dielfennadenn bet graet ez eus en holl 15 listenn engouestlet evit kinnig ur sammad resis. Ledet int war 13 kumun, en o zouez kalz kêrioù bras (Naoned, Brest, Roazhon, an Oriant, An Alre, Gwengamp, Douarnenez, Sant-Brieg, …), ar pezh a ziskouez e teu a benn an azgoulenn-mañ d’ober e doull, harpet m’eo gant an Emsav er bloavezhioù paseet. Setu roll al listennoù engouestlet war ar c’hraf-se. Gallout a reoc’h adkavout pep tra, ez-resis, war lec’hienn Diwan.
Ar budjed evit ar brezhoneg : Sintezenn promesoù al listennoù
