Digresk ar frejoù Bod ha boued - distro skol Gwengolo 2026
Un diviz kreñv evit souten ar familhoù ha kreñvat an eil derez.
20/05/2026
Kemmadenn Bod ha Boued
Demat deoc’h,
A-drugarez d’ar strivoù graet gant ar skolioù, skolajoù ha liseoù (sammadoù kengred ouzhpenn roet gant skolioù ‘zo, fakturennoù an eil derez paeet en trimiziad kentañ ouzhpenn ar pezh a oa rakjedet), eo bet gwellaet disoc’hoù kontoù Diwan 2025 (tro -60 000 € « nemetken » e-lec’h ma oa raktreset -200 000 €).
Ne cheñch ket plegenn ekonomikel ar c’hevread ha talvoudegezh an argerzhadur diarbenn lakaet e pleustr (torridigezh kendivizadel a-stroll), reiñ a ra deomp un digarez da gemer buanoc’h un diviz da aesa ar skoliata en eil derez : digreskiñ priz ar bod ha boued paeet gant ar familhoù.
Setu perak eo bet divizet gant KM Diwan d’ar 6.05.2026 lakaat e pleustr kerkent hag en distro-skol 2026 un distaol war ar frejoù bod ha boued goulennet en eil derez : tro 5 % distaol, gant ur striv ouzhpenn evit ar familhoù adalek 2 vugel skoliataet en eil derez e Diwan.
Amañ kevret e kavoc’h munudoù an diviz.
An obererezh-mañ zo liammet ouzh ar palioù menneget da vare hon emvodoù kelaouiñ : chom degemerus en desped d’an diaesterioù ekonomikel bevet gant ar c’hevread. Mat eo gouzout eo bet kelaouet hon arc’hantaouerien eus ar pal-mañ meur a wech.
Ar bariadenn : dont a-benn da espern arc’hant war ar mont-en-dro, ar c’hevratoù, ar feurmoù, an aozadur diabarzh, ha kalonekaat tud ar skolidi da enskrivañ o bugel en eil derez.
Skipailhoù ar skolajoù / liseoù a-gevred gant servijoù ar c’hevread a chom dibres evit reiñ deoc’h muioc’h a ditouroù.
