Darempred

Degemer > Dibab ar soubidigezh > Ar yezhoù er skol
skol_keryann

Dre ar yezhoù e kresk barregezhioù spered ar vugale

Lire cet article en français

« Ne ya ket en-dro ar yezhoù evel listri kehent. Ne c’hoari morse ar yezhoù an eil a-enep eben. Muioc’h a-se e tesker yezhoù, aesoc’h a-se e vez deskiñ yezhoù nevez. Deskiñ ur yezh ne vez morse diwar-goust deskiñ ur yezh all, er c’hontrol. »

Gilbert Dalgalian, yezhoniour, bet rener pedagogiezh an Alliance Française e Pariz, arbennik eo war an divyezhegezh abred

Ar yezh, benveg dispar a bedagogiezh

Er skolioù Diwan ez eo ar yezhoù binvioù kelenn ha binvioù daremprediñ. Lakaat ar skolidi da vezañ komzerien en o aez, evit daremprediñ ha kemer ar gaoz e brezhoneg, e galleg hag e meur a yezh all zo e kalonenn hor raktres pedagogiezh. Evit en ober e vez roet tro hag aez da bep bugel, e meur a zoare, da zaremprediñ gant e hentez. A-drugarez d’an endro dinec’hus-se e c’hallo reiñ dispak d’e vennozhioù, d’e c’houlennoù pe e vefe e brezhoneg pe e vefe e galleg. Hervez Barbara Abdelilah-Bauer, psiko-sokiologourez arbennik war an deskadurezh divyezhek, ez eo talvoudus-bras d’ar vugale ober gant meur a yezh :

« Ar vugale a ya diwar an eil yezh d’eben meur a wech bemdez a zeu barrek dizale da ober gant ar gerioù sinoù a c’haller eskemm an eil ouzh egile. [...] Ar varregezh-se da zielfennañ ar yezh eo ar bazenn gentañ war-zu an deskiñ lenn. Dre-se e teskont lenn buanoc’h eget ar vugale unyezhek. »

Barrekaat a ra spered ar vugale a zesk un eil yezh adalek ar skol-vamm ; diorren a reont barregezhioù evit kompren, eñvoriñ hag implijout pep yezh. Bez o devez da gentañ da zigejañ pep frazenn evit gallout ezteurel en div yezh. Dre-se e rankont dielfennañ dizehan o doare da zaremprediñ ha rak-se ez a buanoc’h war wellaat ganto ar prederiañ hag ar poellata. Al lavar hag an anaout en em gav gwell a-se pa cheñcher yezh ingal.

Daremprediñ e meur a yezh

Nec’het e vez alies tud ar vugale – ma’z int divrezhoneg – pa ne c’hallont ket ober a-dost war-dro skoliadur o bugale. War-dro 80% eus tud skolidi Diwan n’int ket brezhonegerien : ne harz ket an dra-se ouzh o bugale d’ober berzh er skol na da vezañ gouest da ezteurel e meur a yezh. « Ne gomzomp ket brezhoneg, ret-mat stagañ ganti koulskoude, dre ar pezh a vez desket deomp gant hor mab, eme Armelle Helou, mamm ur bugel eus skol Baod (Morbihan). (...) Seul abretoc’h e kroger ganti, seul welloc’h eo, d’am meno. Dre sellet ouzh hor mab e welomp a-walc’h e tesk brezhoneg en un doare naturel ha n’eo ket diwar-goust an deskiñ galleg ! » Gwir eo, gouest eo ar vugale divyezhek da rentañ kont e galleg eus o labour e brezhoneg hag ar c’hontrol ivez. Pa weler pegen aes eo c’hoari ar vugale gant an div yezh e teu anat ez eo ar yezhoù binvioù pegagogiezh a-zoare.

E-kerzh skoliadur ar c’hentañ derez e teu barrek-mat ar vugale da zaremprediñ. Da-heul-se, gant an eil derez, e vo diorroet o barregezh ezteurel dre skrid ha donaet o anaoudegezh eus ar brezhoneg. « Alies e c’houlennomp gant hor skolajidi labourat a-stroll, eme Pascale Chevillard, renerez pedagogiezh an eil derez. Labourat a reont evel-se el levraoueg ma kaver levrioù e brezhoneg, e galleg, hag ivez e saozneg. Ober a ra ivez ar skolidi enklaskoù war ar genrouedad ha diwar pennadoù a bep seurt e vint gouest da sevel ul labour, a vo kinniget e brezhoneg. » Evel-se e weler o deus ar yezhoù un dalvoudegezh pedagogiezh a-bouez : dont a ra ar vugale da vezañ komzerien glok e pep yezh desket ha mont a reont diboan-kaer diwar an eil yezh d’eben.

Gerioù-alc'hwez stag : divyezhegezh   

Skignañ ar pennad-mañ

Lenn ivez

Tombola Diwan 2020 ampelaet

Deiziet e oa e miz Even 2020, met abalamour d'ar prantad kenfinañ ez eo bet divizet adkas an dennadenn Tombola Diwan d'an 10 a viz Here 2020.

Ar vakañsoù benn ar fin !

Setu echu ar skol ! Vakañsoù deuet mat evit an holl goude ur bloavezh ispisial-tre, ar pezh n’en deus ket miret ouzh izili Diwan...

Ur skolaj Diwan en Il-ha-Gwilen en dazont

Ne vo ket digoret ur skolaj Diwan en Il-ha-Gwilen e miz Gwengolo 2020 evel raktreset. Koulskoude e kendalc'ho Diwan hag an Departamant...

Ensavadurioù foran : diouer a vrezhoneg da vare ar c'hleñved red

Kevre Breizh, skourr Breizh Elen (European Language Equality Network), en deus savet un danevell evit Kuzul Europa war ar gwall ziforc’h...

An holl bennadoù war an tem-mañ