Ur remziad nevez a vachelourien !
10/07/2019
Er skolajoù, 206 skoliad war 211 o deus tapet o Breved. En o zouez, 86% o deus resevet ur meneg (60 meneg « mat tre », 65 meneg « mat » ha 57 meneg « mat a-walc’h »). C'hwec'h skolajiad a dremeno o arnodennoù en miz Gwengolo abalamour d’ar cheñchamant deiziad dibabet gant ar vinisterezh en abeg d’an amzer c'hor.
An AKED hag an DIBAB a zo arnodennoù diabarzh Diwan e brezhoneg evit an dredeidi :
- 57 skoliad (26%) a dizh al live C1 eus ar Framm europat boutin dave evit ar yezhoù (FEBDY)
- 105 skoliad (49%) a zo gant al live B2
- 47 al live B1 (19%)
- 14 al live A2 (6%)
El lise ez euz bet kinniget 103 emstriver ha 100 o deus tapet ar vachelouriezh. Ar feur pengenniñ a sav da :
- 95,8% e S (46 loread)
- 96,6% e ES (28 loread)
- 100% e L (26 loread)
Ar bloaz-mañ, 15 lisead o deus tremenet o arnodenn matematikoù e brezhoneg. E penn kentañ miz Gouere o doa skrivet ar c’hevredigezhioù sevenadurel d’ar rektor. Respontet en doa e oa un emvod labour raktreset en distro-skol.
E Kelenn, 13 loread a zo bet anvet evit 13 post e kenstrivadeg kelenner ar skolioù.
