Kenemglev Stad-Rannvro : ur gejadenn dichipot gant ar Rektor
Kemennadenn
21/01/2022
Daoust da gomzoù brav ar Rektor e Kuzul Akademiezh ar Yezhoù Rannvro d’ar Meurzh 18 a viz Genver diwar-benn an emziviz, kinnigoù ar rannvro hag an deiziataer heuliet mat evit ar c’henemglev Stad-Rannvro, n’o deus ket servijoù ar rektordi respontet tamm ebet d’hor goulennoù. Ni gave ganeomp mont war-gil zoken.
Ar rouedadoù kevredigezhioù (Diwan, Divyezh Breizh : Kevredigezh rannvro tud ar skolidi evit ar c’helenn ar/e brezhoneg er skolioù publik, Divaskell Breizh : rouedad kevredigezhioù Dihun tud ar skolidi er skolioù divyezhek katolik, Kelennomp ! : kevredigezh ar gelennerien e brezhoneg, Kevre Breizh : kenurzh sevenadurel kevredigezhel e Breizh) o doa galvet d’en em vodañ dirak rektordi akademiezh Roazhon d’ar Merc’her 19 a viz Genver.
Trugarekaat a reomp an holl vugale, tud ar vugale, tud tost o c’halon ouzh Diwan hag an dilennidi da vezañ deuet dirak ar Rektordi daoust d’ar glav ha d’ar yenijenn, evit diskleriañ hon nec’hamant war ar fed e chom bout ar c’hevraouiñ. Talvoudus-kenañ eo bet dre m’en deus ar Rektor asantet degemer dileuridi eus ar strollad ha dilennidi.
Gant an emgav dic’hortoz-mañ, padet ouzhpenn un eurvezh ez eus bet gellet kejañ dre ar munud ha war-eeun gant ar Rektor ha lakaat ar gaoz war goulennoù ar strollad.
Gellet hon eus komz diwar-benn un nebeud dibarderioù eus ar c’helenn kevredigezhel dre soubidigezh :
-
ar c’hevratañ kerkent ha krouet skolioù nevez er c’hentañ hag en eil derez,
-
an doareoù da arc’hantaouiñ ar greizenn stummañ Kelenn,
-
ar c’henemglev Stad-Rannvro-Diwan meneget er gevrat evit an ober publik e Breizh.
Ouzhpenn se hon eus goulennet resisaat an doareoù e-keñver an debarzhadur hollek a eurvezhioù (DGH), da lavaret eo an eurvezhioù kelenn brezhoneg er skolaj hag el lise hag an arnodennoù e brezhoneg kuit da vezañ forc’hellek an doare da bleustriñ gant kelc’hlizher ar 16 a viz Kerzu 2021 war ar c’helenn divyezhek.
War-lerc’h ar gejadenn-mañ ha war-lec'h bezañ displeget hor goulennoù e c’hortozomp digant ar Rektor ma vo kemeret e karg hor goulennoù a gaver e-barzh kinnigoù kempouez ar Rannvro.
Kontañ a reomp ivez war kannaded Rannvro Breizh evit reiñ da anavezout hor goulennoù e penn uhelañ ar Stad ha gwiriañ evel-se o vot evit al lezenn Molac hag o anaoudegezh ouzh ar yezhoù rannvro.
10 devezh a chom evit dont a-benn da gaout un destenn uhelek a c’hello bezañ votet da geñver abadenn a zeu Kuzul Rannvro Breizh e miz C’hwevrer.
