Digeriñ a ra skol Diwan Orvez e distro-skol 2025

Ur skol Diwan nevez a vo digoret e miz Gwengolo 2025 en Orvez, ur gumun vras (27.000 den) stag ouzh Naoned. Ar raktres-se a zo bet douget gant ur strollad tud a-youl vat dedennet gant ar c'helenn e brezhoneg dre soubidigezh ha gant familhoù bet plijet gant raktres an divyezhegezh abred.

Abaoe 2019 ez eus bet klasket lec'hioù disheñvel evit ar raktres skol Diwan nevez e Bro-Naoned (e Kernitron-al-Lann pe e Gwinieg-Breizh), hag a-benn ar fin ez eus bet kavet ul lec'h gant skoazell Ti-Kêr Orvez : ur savadur lec'hiet er 5, straed Landreau, bet implijet gwechall evel ur vagouri. D'ar 27 a viz Meurzh 2025 e oa bet sinet ur feurm emfiteotek evit 35 bloaz etre ar gumun ha Diwan Orvez neuze, evit ma c'hello ar skol en em staliañ en ur mod stabil ha padus.

Un toullad labourioù a vez graet evit kempenn al lec'h, ha buan e vo aozet ar skol evit degemer ar vugale hag ar skipailh pedagogel, gant ar pal plantañ brezhoneg en ul lec'h ma n'eus skol Diwan pe divyezhek ebet c'hoazh, daoust d'ar c'hoantoù.

Biskoazh n'omp bet ken tost da zigeriñ ur skol Diwan nevez e Bro-Naoned. Trugarez d'an holl o doa kemeret — ha d'ar re a gemero — perzh er raktres !

Ma'z oc'h dedennet evit lakaat ho pugel pe ma anavezit tud hag a c'hellfe bezañ, skrivit deomp dre amañ :
skoazell.diwan.orvez@gmail.com