Kenavo Gwenole

 

---

 

 

Gwall glac’haret eo hor c’halonoù, ha skodeget hor speredoù, o klevet ar c’heloù fallmañ. Trumm eo marvet Gwenole Bihannig. Kelenner brezhoneg hag arzoù kaer anezhañ, e Skolaj Diwan Ar Releg.

 

Evit meur a hini e oa ur c’heneil a-gozh. Er bloavezh 1991 e voe kontet e-touez tud skipailh ar skolaj. Estreget ur c’heneil e oa deuet da vezañ e berr amzer : ur mignon, ur c’hartost e familh Skolaj Diwan Penn-Ar-Bed.

 

Dalc’hmat war ar stern, kelenner entanet ma oa-eñ, e ouie kas e gentelioù ha plijout d’e skolajidi. Ouzhpenn daou vil anezho o do gwellaet o brezhoneg ha pleustret war an arzoù kaer a-drugarez dezhañ. Hemañ a ouie broudañ hag ambroug ar yaouankizoù, hilligañ o speredoù. A vloaz da vloaz eo bet gouest da gas e skolidi dre hentoù a bep seurt, ur gwir binvidigezh : troidigezh daou album Titeuf, livadurioù hed-a-hed mogerioù ar skolaj, lakaat skrivañ levrioù, krouiñ videoioù evit sonioù, kanaouennoù, pezhioù-c’hoari, kenstrivadegoù haiku ha barzhoniezh…

 

Paotr ar yezhoù anezhañ, paotr e eizh yezh pa vo lavaret mat. Ha dreist pep tra, ar brezhoneg, ma oa ken fonnus ha puilh e anaoudegezh anezhañ. Un teñzor ar brezhoneg a oa anezhañ, kar-e-yezh. Ha desket c’hwek war sevenadur Breizh. E lod en deus graet evit magañ hol lennegezh vrezhonek avat, gant troidigezhioù ha romantoù, studioù ha bannoù-treset.

 

Skrivañ, krouiñ, tresañ a vourre, dornet kaer ma oa. An heol splann hag an oabl digatar a blije dezhañ. Na pet gwech en deus kontet deomp pegen laouen e oa o welet Júlia o kreskiñ hag o vleuniañ, hag ar blijadur en doa o vont da Gatalonia gant Núria da welet o c’hrouadur o tont da vezañ dañserez a vicher !

 

Dreist-holl e plije d’e geneiled e fent lemm ha fin. Seder e oa an tamm anezhañ hag uvel daoust d’e ouiziegezh frank ha don.

 

« Te a vanko deomp, Gwenole. Vakañsoù laouen dit ! »

 

Skipailh skolajoù Penn-Ar-Bed

 

---

 

An obidoù a zo bet dalc'het e bro Katalonia d'ar Gwener 24 a viz Here 2025. Ul lid a vo aozet gant e familh diwezhatoc'h e Breizh.

 

---