Diwan : familhoù niverus, familhoù eürus !

A-viskoazh e fell da zDiwan treuzkas ar brezhoneg e kement degouezh ar vuhez. Mont a reomp pelloc'h eget ar salioù klas evit ober kement-mañ. Er skolajoù hag el liseoù Diwan eo a-bouez bras ar prantadoù tro-skol hag ar c'houskva : beilhadegoù, predoù, darvoudoù, nozvezhioù gant mignon·ezed... Da geñver an degouezhioù-se e c'heller ober eus ar brezhoneg yezh ar vuhez pemdez evit kreñvaat ar soubidigezh hag al liamm gant ar yezh.

Ar fakturennoù evit ar bod ha boued e Diwan a glot gant ar vuhez-se, ret evit kas da benn hor raktres dre soubidigezh.

Setu ar pezh az a d'ober ar fakturennoù-mañ :

• ar bod ha kempenn ar savadurioù,
• ar boued (dijuniñ, lein, merenn-vihan, lein),
• ar skipailhoù evit ar c'hempenn hag evit servij ar predoù,
• buheziñ e diavaez ar prantadoù klask ha beilhadegoù,
• ar skipailh buhez-skol a vez oc'h ambroug ar re yaouank war ar pemdez.

Emskiant omp ez eo ur striv evit ar familhoù, muioc'h c'hoazh evit ar re meur a vugel ganto en eil derez e Diwan. Setu perak hon eus divizet adwelet ar prizioù evit an distro-skol 2025-2026 :

• - 20 % digresk pa vez daou vugel enskrivet en eil derez e Diwan (skolaj ha/pe lise)
• - 25 % digresk pa vez tri bugel enskrivet en eil derez e Diwan

An digresk-se a dalvezo evit pep bugel, evit ar frejoù bod ha boued.

Un diviz kreñv an hini eo, gant ar pal aesaat degemer ar brasañ niver en hon hentenn kelenn e brezhoneg dre soubidigezh, ha war ar memes tro gellet kenderc'hel da zegemer ar re yaouank deus ar gwellañ hag ambroug anezho er vuhez e diavaez ar prantadoù klas.

Trugarekaat a reomp ac'hanoc'h a-greiz kalon evit ar fiziañs ho peus e Diwan hag evit hoc'h engouestl er raktres-stroll-mañ evit treuzkas ar brezhoneg.

Evit gouzout hiroc'h ha dre ar munud ar mod ma vo jedet ar frejoù en distro-skol e c'hellit mont e darempred gant skolaj pe lise ho pugel.