Distro skol miz Du : en em azasaat a ra Diwan ouzh ar protokol nevez

30/10/2020

Deizad nevesadur diwezhañ : 11 a viz C'hwevrer 2021 da 10 eur.

D’al Lun 2 a viz Du e vo an distro-skol er skolioù, skolajoù ha liseoù Diwan.

D’an 2 a viz Du 2020 e tigoro ar skolioù, skolajoù ha liseoù Diwan, d'an eurioù boaz. Kenderc’hel a ra ar skipailhoù pedagogel hag ar servijoù Diwan da labourat evit aozañ ar gwellañ degemer evit ar vugale hag an dud gour.

Embannet ez eus bet gant Ministerezh an Deskadurezh Stad ur protokol yec’hedel nevez kreñvaet a vo lakaet e pleustr en holl skolioù, skolajoù, liseoù. Setu amañ dindan ar pennaennoù a ranko bezañ heuliet gant hor skipailhoù ha familhoù :

Doujañ d’ar jestroù a-enep ar c’hovid
Chom pell an eil re diouzh ar re all
Gwiskañ ur maskl evit an dud gour hag ar skolidi adalek ar CP : pourvezet e vo ar maskloù gant ar gerent daoust ma c’hello ar skol reiñ ivez ma vez ezhomm.
Gwalc’hiñ an daouarn
Naetaat hag aveliñ ar salioù
Chom hep en em vodañ betek re

En eil derez e tigor ar skolajoù hag al liseoù d’al Lun 2 viz Du d'an eurioù boaz. Bez e vo eus an treuzdougen ha digor e vo ar c'houskvaoù gant ur protokol kreñvaet war an doareoù da zegemer.

E Kelenn, ar studierien·ezed Master 1 ha 2 a heul ar c’hentelioù enlinenn. Ar sekretourva hag al levraoueg a chom digor, ret eo kemer un emgav evit dont.

Prest eo ar skipailhoù Diwan da respont d’ar goulennoù a vefe gant ar gerent, izili an AEPoù hag ar c’huzulioù skoazell.

Kalon vat ha distro skol mat d’an holl gelennerien·erezed, implijidi·adez, kerent ha d’hor skolidi daoust d’ar stad m’emañ an traoù. Chomomp en em stardet hag unvan er mareoù kriz-mañ.

> Evit ho tibennoù-sizhun kenfinet, kavit amañ danvezioù niverel e brezhoneg