C’hoari, gwellañ tra zo !
Gant Aplud en deus krouet Sten Charbonneau tri c’hoari taol – eus 7 da 77 vloaz – da bal dezho lakaat ar re a gemer perzh da vrezhonegañ : Din an dorn, Klask ar ger ha N’out ket barzh. Gant Keit vimp bev ez eus lakaet war ar marc’had c’hoarioù kartoù (7 familh, memory…).
Gant Ofis publik ar brezhoneg e kaver daou roll-gerioù, 120 ger enno, diwar-benn ar c’hoari : C'hoari tablez et C'hoarioù kartoù.
Un doare brav da zihuediñ pa chomer en ti endervezhioù-pad eo ar c’harned c’hoari Doug & Buster war zu al loar (adal 7 vloaz), un diverr-amzer all eo gerioù-kroaz Frañsoaz Lermen, Jean-François Peden pe DAO. Petra’virfe da glask sevel, gant mignonezed ha mignoned, ur pezh-c’hoari berr ? Un daou-ugent pezh-c’hoari bennak a c’haller kaout war lec’hienn TES.
C’hoari e brezhoneg a c’haller ivez gant ur skramm. Ar c’hoari skinwel C’hoari ha deskiñ zo war ar chadenn Brezhoweb ; enrollet e vez e pevar c’horn ar vro. Bez ez eus ivez modulennoù bihan a c’hoarioù en linenn :
- Korn ar vugale gant TES
- C'hoarioù en linenn krouet gant skolajidi ar Releg
- Kej-mesk (pellgargadus en ur pellgomzer hezoug)
- ...
Hag evit kas ar c’horf en-dro el liorzh pe el liorzh-kêr n’eus netra par d’un abadenn koach-koukoug pe kuzh-kuzh, un tamm c’hoari sparfell, pe mouchig-dall pe c’hoazh klask-an-teñzor. Evit loc’hañ an abadenn ha tennañ ar berzhidi d’ar sord e vo gallet dibunañ kement-mañ :
|
« Ul loa, div loa, Karabin, karaba, Impin, bourdon, Kadbarin, grifon, Er maez kompagnon » |
« Ul laer er c’haol, Piv eo? Yann Voudig eo. Pelec’h emañ? Kuzhet eo. » |
« Ar bleiz kozh ’pad an noz A jilgamm E droad kamm Al loargann ’barzh ar stank A c’hoari Patati ! » |
« Bicha, bicha, Kik ala Piv a yelo da gerc’hat Kerzh d’ar foenneg Mard eo ret, kerzh d’ar gêr Pe ’vezi taget ! » |
Ma anavezit c’hoarioù all, skrivit deomp : demat@diwan.bzh !
C’hoari war an ton bras e-kerzh ar vakañsoù
Evit adkavout ar vignoned ha c’hoari e brezhoneg pa ne vez ket skol e vez kinniget vakañsoù e brezhoneg gant meur a gevredigezh. Gant an Ubapar e vez ur c'hatalog bep bloaz hag a vez dasparzhet er skolioù e penn kentañ ar bloaz. Ledan eo an dibab : sportoù, natur, mor, obererezhioù arzel, avañturioù, kerzhadennoù…
E kêrioù zo evel Gwengamp, Roazhon, Landerne, e c’hall bugale ar skolioù divyezhek en em gavout d’ar merc’her d’enderv pe e-kerzh ar vakañsoù er greizenn dudi.
