Skolaj Diwan Gwiseni

Dont a ra ar mor tost betek ar sal-debriñ. Emañ ar skolaj en un ouf war an aod e Gwiseni. «Skol an aod» e oa gwechall, ur skolaj prevez. Emañ Skolaj Diwan Gwiseni amañ abaoe dek vloaz bremañ goude bezañ bet e-pad tri bloaz e Treglonoù. Stag eo ouzh Skolaj Diwan ar Releg. Kant pevarzek skolajiad zo ar bloaz-mañ. Plas zo evit brasaat. Hag a-benn daou vloaz bennak e vo ur savadur nevez hag ur c'houskva war al lec'h. Evit ar mare e vez lojet ar skolajidi evit an hanter e Ploueskad hag an hanter all e Plougerne. Kalz a c'hoariva a vez graet er skolaj ha filmoù berr ivez. Kan a vez ivez ha meur a wezh ez eus bet skolajidi o vont da Gan ar Bobl, evit gounit evel-just... Amañ e Gwiseni e vez kalzik a vrezhonegerien tro-dro. Plijus eo evit eskemm gant tud ar vro Bagan. Eskemmoù a vez gant tud arallvro ivez evel Euskariz pe Alamaned. Evel e Skolaj Diwan Kemper eo echu gant an notennoù amañ. Tennet e vez kont eus barregezhioù ar skolajidi kentoc'h. Kig-ha-fars a vez graet gant ar c'huzul skoazell bep miz Genver.