|
|
|
| | AMAÑ EMAOC'H > Degemer > Ar c'helenn
Ar skol-vamm
Evel meneget e karta Diwan, e vez implijet ar brezhoneg evel yezh
kelenn eus ar skol-vamm betek al lise. Gant ar bedagogiezh implijet
e vez dalc'het kont eus :
- an digempouez etre ar brezhoneg hag ar galleg er familhoù, er
vuhez foran, er media...
- an anaoudegezhioù skiantel evit ar pezh a sell ouzh diorroadur
ar bugel, prenañ skiant ar gomz, mont-en-dro an deskiñ.
- stad ar c'hlask e-keñver an divyezhegezh hag ar skiant prenet
gant sistemoù a vent vras (Bro-Gembre, Katalonia, Bro-Ganada...)
Eus ar skol-vamm betek ar CP :
Implijet 'vez gant ar skolaer ar brezhoneg hepken, gant an hentenn
graet "soubidigezh" anezhi. E derou ar skol-vamm, e vez implijet
gant ar bugel pe ar brezhoneg, ma 'z eo gouest d'ober gantañ, pe
ar galleg. En degouezh diwezhañ, e vo implijet ar brezhoneg gant
ar bugel tamm-ha-tamm, diouzh e ritm. Ar sistem "naturel"-mañ (deskiñ
dre ar soubidigezh) a ra berzh e bro-Ganada abaoe 30 vloaz.
Teir fazenn a c'heller diforc'hañ pa vezer o teskiñ ur yezh :
- Pazenn ar c'hompren a vez tizhet, peurvuiañ, buan a-walc'h
er skolioù-mamm dre ma vez implijet bemdez ur c'heriaoueg o tennañ
d'an traoù a vez dedennet ar bugel ganto.
- Pazenn an eskemm-komzoù a vez tizhet goude; gellout a
ra an eskemm skolaer-bugel bezañ e brezhoneg : santet 'vez ez
eo ar yezh ur benveg da vat evit deskiñ. Diouzh meur a barametr
e vo tizhet ar bazenn-mañ : implij ha youl-zeskiñ er familhoù,
talvoudegezh roet gant ar bugel d'ur yezh ha d'eben, levezon an
diavaez (skinwel da skouer...) Gant ar soubidigezh e vez skañvaet
an digempouez etre an div yezh evit ar vugale na gomzont ket brezhoneg
er gêr.
- Pazenn ar meizata (tizhet peurvuiañ a-raok fin ar skol-vamm)
a vez posupl ganti un implij liesek eus ar yezh : eskemm, soñjal,
poellata ez-matematikel, krouiñ. Prest eo neuze ar bugel da gregiñ
gant an anaoudegezhioù diazez : lenn, skrivañ, matematik.
| |
|
